葡萄牙新世代担大旗

欧国联A3次轮大战，瑞典主场硬撼上届冠军葡萄牙。葡萄牙虽有王牌C朗上阵成疑，但以曼联中场波基斯费南迪斯为首嘅新一代已能担大旗，尤其客场打法比以往更加进取，瑞典主场亦不保守，中位数2.5球嘅入球大好路。

葡萄牙向来靠C朗单天保至尊，不过佢已经35岁，近年伤患渐多，包括今次脚趾受伤未必披甲，主帅费兰度山度士开始为后C朗时代铺路。喺英超表现突出嘅曼市孖宝波基斯费南迪斯同贝拿度施华，喺上场欧国联都交出助攻，帮队波大胜克罗地亚4比1，有「新C朗」之称嘅马体会前锋祖奥菲历斯，以及喺德甲回勇嘅安达施华均建功，呢班新一代已挑起大樑，令葡萄牙有本钱踢得更主动。

瑞典主场出击唔保守

不过针冇两头利，同中前场相比，葡萄牙防线人才凋零，现时仍要倚重老人家比比同荷西方迪，正所谓岁月催人老，呢对4年前欧国盃冠军功臣状态明显走下坡，令防线稳健度大减。

瑞典早前有左闸马田奥臣因伤退队，补选前锋约翰古达迪，似乎想增强锋线板櫈深度，其中上季喺皇苏冒起嘅前锋阿历山大伊沙克，以及德甲搵食嘅古艾臣表现亦愈嚟愈好。睇番瑞典主场出击并唔保守，近9场主场8仗有士哥，随时藉地利同对手斗攻，加上葡萄牙近7场作客赛事入18球，当中5次开3球或以上，今场中位数2.5球入球大值捧。