兄弟国内讧捷克恶晒

东欧兄弟国斯洛伐克同捷克，今晚喺欧国联B2组首轮赛事碰头。捷克近年「大虾细」，近4次对斯洛伐克3胜1负，包括上届欧国联主客2场都赢晒，效力RB莱比锡嘅前锋柏德列舒希克2仗均有进帐，今场捷克可延续剋星本色。

斯洛伐克冇埋咸锡

喺1993年「天鹅绒分离」分裂出嚟嘅斯洛伐克与捷克，上届欧国联成绩一般，所以继续喺B级联赛角逐。不过，如果计算欧国外成绩，捷克则远超斯洛伐克，捷克于分组赛仅次于英格兰，以A组次名直接出线决赛周，相反斯洛伐克仍要靠附加赛出线，下年附加赛4强要斗爱尔兰。

斯洛伐克近年成绩转差，开始出现青黄不接，主要系靠咸锡撑住，不过呢位沙场老将目前喺中超大连人搵食未有随队，球队实力大打折扣，加上一号门将效力纽卡素嘅杜巴夫卡因伤缺阵，令斯洛伐克焗住用一班超过30岁嘅球员落场，莫讲话赢，想有分落袋都几难。

捷克以布拉格斯拉维亚球员做骨干，配合两名德甲兵包括效力哈化柏林嘅队长达列达，以及RB莱比锡射手柏德列舒希克，活力及经验皆不俗，其中柏德列舒希克对上2次对斯洛伐克都有斩获，助球队分别于主场以1比0及作客2比1赢波，今场佢肯定正选上阵博杀，捷克有力反客为主。