国米冲决赛开萨戒

卢卡古弗爆揿住抢

今晚欧霸盃4强战，国际米兰喺德国中立场火併萨克达。国米气势如虹，箭头卢卡古更打破跨届欧霸连续入波纪录，信心爆晒棚，萨克达唔单止输质，过于冒进打法令防守问题曝光，啱晒国米打反击，赢波杀入决赛，主胜捧得过。

今季挑战意甲锦标失败嘅国米，对欧霸盃充满野心，自从喺欧联分组赛出局后，转战欧霸盃4场赢晒，包括复赛后接连淘汰实力分子基达菲同利华古逊，若连同联赛在内，近5场全胜仅失1球，攻守兼备。虽然阿历斯山齐士因伤上阵成疑，国米仍有孖宝拿达路马天尼斯伙拍卢卡古攻坚，后者上圈击败利华古逊亦建一功，更打破英格兰名宿舒利亚纪录，成为史上首位跨届连续9场欧霸盃有士哥嘅球员，脚风顺到冇朋友。

萨克达质素差一截

另一边厢，萨克达近5场欧霸盃取得4胜1和，睇落唔错，但对手只係禾夫斯堡、巴素利及宾菲加之流，今场遇强不宜高估。呢支乌克兰班霸以马路斯、泰臣巴些路斯、祖利亚摩拉斯为首，进攻大过天，呢5场欧霸入咗14球，足证火力不弱，不过当中得1场冇失波，反映其过于进取嘅打法，令防线更加不稳。国米主帅干地最惊你唔攻，只要你肯攻，佢哋嘅快速反击即大派用场，萨克达随时正中下怀，「蓝黑兵团」有力自2010年欧联捧盃，再次杀入欧洲赛决赛，主胜有计。