曼联超班上盘唔怕追

势劏宁斯谷士气

状态大勇嘅曼联，喺欧霸盃16强次回合主场迎战宁斯。曼联首回合作客领先5比0，明显超晒班，虽然晋级机会浓，领队苏斯克查为保持球队状态及士气，相信唔会放软手脚，即使用副选都会搏尽，加上球队近3次主场出战欧霸盃均赢对手3球或以上，让球半/两球嘅上盘放心捧场。

曼联喺复赛之后，各项比赛11战录得6胜4和1负，攞到欧联入场券，依家专心争欧霸，相信会严阵以待，佢哋首回合以大比数领先，相信领队苏斯克查会畀部分副选落场，但主力仍然会喺下半场上阵，轻舒脚头保持状态，因为踢完今仗，几日后就要出战8强，始终保持球队士气同争胜心，对继续晋级有好大帮助。

近3次欧霸主场坐底赢3粒

奥地利新贵宁斯停摆前喺奥甲领导群雄，不过休战期间，球队安排一大班球员一齐操练，违反抗疫规定畀联赛会扣分，影响备战士气，复赛后进行嘅10场争标组赛事，佢哋只得3胜1和6负，球队表现大幅下滑，尤其最后3场全部输晒，联赛最终只得第4，士气跌到落谷底。

曼联出战欧霸实力超班，近10仗有8场能够保持清白之身，加上近3次主场出战欧霸，均能大胜对手3球或以上，即使出部分副选球员都唔怕，一嚟二线球员嘅实力仍然喺宁斯之上，二嚟曼联下季有得踢欧联，有更多本钱增兵，后备球员唔想畀人打入冷宫，有机会都要尽显身价，一定唔会Hea踢，相信对住首回合落后0比5、无心恋战嘅宁斯，同样可以大胜壮声威，让球半/两球唔怕多，照捧上盘。