面子之争胜利水手大厮杀

今午澳职有场榜尾对决，由尾2嘅墨尔本胜利喺中立场对垫底嘅中岸水手。两队已经无缘晋级季后赛放鬆晒，近年碰头又例演入球骚，宁捧2.5球嘅大盘。

近5交锋炮製25个士哥

今仗係笃定包尾嘅水手煞科战，既然赢输都冇任何影响，今仗纯粹睇吓边队想攞番个尾彩。贵为上季常规赛季军，胜利今季长时间喺下游徘徊，而复赛后亦连输2场，早前因有射手托禾伦同贺兰离队，就提升咗艾朗安达臣、西川聪等5名青年军上一队，虽然上仗仅输畀狮吼，但几位生牯仔都几搏命，相信今场唔会hea踢。

水手连续3季都包尾收场，不过要留意，佢哋复赛后3战获2和1负，包括接连打和纽卡素喷射机同西悉尼流浪者，证明呢班友都有羞耻之心，今仗仲要係煞科战，相信都想好好睇睇。翻查纪录，双方近5次正面交锋，合共炮製25个士哥，全部都开3球或以上，包括今年年头中岸爆冷赢3比2，今场随时又大驳火，2.5球嘅入球大更值得捧场。