麦巴比缺阵攻力大减

今晚法国联赛盃王者之战，力争「4冠王」嘅巴黎圣日耳门（PSG）于中立场巴黎法国球场同里昂争冠军。PSG近4次对里昂赢3次，表面上强弱悬殊，不过睇番比赛过程绝非一面倒，有3次半场打成平手，而且PSG上场法足盃决赛有基利安麦巴比受伤，为免再有球员伤出，相信PSG今场会更加避重就轻，伺机而动，波童推介半场和。

PSG上周于法足盃决赛1比0击败圣伊天，闯过「4冠王」第2关，可惜前锋基利安麦巴比被粗暴踢伤，除咗今仗肯定缺阵，下月重开嘅欧联8强对阿特兰大亦唔使预佢，对争做「4冠王」有一定影响。虽然PSG前线人才济济，不过麦巴比有脚法、有速度，球队经常靠佢喺边线快放破密集，好似上场击败圣伊天嘅奠胜入波，正係麦巴比一次个人突破后射门被挡，然后由尼马门前「执鸡」补射入网，依家冇咗麦巴比，前线威胁大大减低，对方守衞要布防亦相对容易。

迪比复出里昂夫添

里昂喺上季法甲腰斩前排第7，除非佢哋可以喺稍后时间重开嘅欧联捧盃，否则今场係佢哋争取出战下届欧洲赛嘅最后机会。里昂近期热身赛先后击败尼斯及些路迪，状态唔错，而且上季季中受伤嘅队长迪比及中场新星云尼艾迪拿迪已康复，夫添出击未必冇得打。虽然里昂近4次斗PSG输3次，不过其中有3次喺上半场同PSG打成平手，有气有力嘅时候形势唔输蚀，今场一场过决胜负，相信大家都会踢得更为谨慎，半场和开出机会高。