国米争阿二主Ｗ手到拿来

国米前锋卢卡古喺今季意甲攻入 23球，状态托弗。

意甲好戏码，国际米兰主场迎战拿玻里，由于祖云达斯已经提早夺得冠军，国米今场只能为亚军名衔而战，主帅干地首季领军，当然要力争最高排名，「老二」之位都唔会放过，加上两位前曼联射手卢卡古、阿历斯山齐士近况大勇，有力击败拿玻里，报番意大利盃被对方淘汰之仇，一于捧主胜。

意甲亚军之争其实好激烈，第2位嘅国际米兰都只係领先阿特兰大同拉素1分，干地为证明自己有能力下季捲土重来，梗係要争取最佳成绩，令管理层对佢有信心。事实上，国米近期状态回升，卢卡古、阿历斯山齐士上场仲一齐入波，表现吐气扬眉。其中卢卡古今季意甲已经有23球进帐，成为国米史上首季踢意甲入波第3多嘅球员，比第2位「大哨」朗拿度少2球，卢卡古一定想把握最后2场数胡机会，争取超越呢位巴西名宿。

至于阿历斯山齐士复赛后，表现脱胎换骨，近5场入2球兼交出4次助攻，佢同卢卡古非常合拍，大大提升国米攻力。国米上月意大利盃4强次回合被拿玻里淘汰，今场返到自己地头，必定会趁机报仇。

拿玻里遇强冇运行

拿玻里上场赢到萨斯索罗，唔多唔少靠VAR帮手，将对手4次入球都判无效。睇番拿玻里今季作客遇强即屈，包括输畀祖云达斯、罗马、拉素、阿特兰大，近两场作客对弱队都赢唔到，包括打和博洛尼亚，以及不敌帕尔马，今场到去圣西路球场，情况更加唔乐观。