流浪者追打水手
今日有澳职独脚戏，中岸水手主场迎战西悉尼流浪者，中岸水手喺复赛之后2场仅1和1负，并且入唔到波，表现持续低迷。客队西悉尼流浪者今场係赛事重开后首次出击，可能未必恢复十足状态，但佢哋胜在係中岸水手嘅剋星，双方近7次交锋，流浪者赢咗6次，西悉尼流浪者让半一，可博上盘。
因为赛程安排，西悉尼流浪者到今日先正式有波踢。一如不少球队，流浪者喺停摆期间都有阵容变动，瑞士籍门将丹尼尔卢柏因疫情未有归队，不过，主力外援如西蒙确斯、派文舒维加同尼古拉梅拿就继续留低，其中梅拿暂时入咗5球，佢同入咗11球嘅前锋米歇尔杜基合作无间，令球队实力得以保存。同时，喺1月以看守教练身份代替巴布尔领军嘅迪马历尼，就成功「坐正」。
力争季后赛战意有保证
本身流浪者喺停摆前表现不俗，虽然只係排第9，但距离第6嘅阿德莱德联只有5分，并少踢2场，要争取打入季后赛仲未绝望，战意有保证。加上西悉尼流浪者上次作客以3比1击败中岸水手，米歇尔杜基、尼古拉梅拿就各入1球，心理上佔优。
另边厢，中岸水手已经积弱多年，过去2季都係排包尾过终点，如非澳职冇降班制，佢哋早已经唔喺度。中岸水手今季表现一样冇起色，现时都係垫底排第11位，踢24场联赛仅得4胜2和18负，其中近12场未赢过，输咗11场，实力有几差可想而知。加上澳职即将结束，中岸水手已无缘季后赛，更加唔会搏，随时放软手脚等收咧。再睇埋西悉尼流浪者近5次对中岸水手，有4次赢2球，让半一照要上盘。
