摩拉斯尼克普比金手套斗一番

英超最后一轮，除咗神射手之外，金手套之争同样激烈，曼城门神艾达臣摩拉斯，同般尼门将尼克普比同样保持15场清白之身，要到最后呢轮先分出高下。

艾达臣摩拉斯今季上阵34场1红3黄，尼克普比从冇缺席英超，37场全勤，只获1面黄牌，表现非常稳定，曼城煞科战主场斗榜尾嘅诺域治，相信艾达臣摩拉斯唔会失波，加上曼城入多3球就可以达100球大关，今场捧3.5球入球大。

至于般尼主场迎战白礼顿，尼克普比亦好大机会可以保持清白之身，球队近7场全开2球或以下，今场拣2.5球入球细。

曼城吼大般尼博细

如果最终2人同场数究竟会点计？自2004/05年球季设立金手套奖以嚟，只颁畀一名门将，如果清白之身一样，就会计出场比率。但自2013/14年球季开始取消呢个制度，只计清白身场数唔计出场数字，所以艾达臣摩拉斯同尼克普比有机会开心Share英超金手套。

上次由2名门将同得金手套，就係2013/14年球季，由当年效力车路士嘅施治同阿仙奴嘅施捷斯尼分享，至于保持英超金手套最高不失场数嘅亦係施治，佢喺2004/05年球季为「车仔」保持24场不失，助球队首夺英超冠军。