曼联半场搞掂韦斯咸

今晚英超头场赛事，曼联主场硬撼「锤仔帮」韦斯咸。曼联啱啱英足盃出局，对力争联赛前4战意更坚，自复赛后联赛连场报捷，中锋安东尼马迪尔亦搵番射门鞋，遇上已肯定上岸嘅韦斯咸，势必藉主场之利先发制人，半场主胜有买趁早。

曼联啱啱英足盃4强以1比3输畀车路士出局，捧盃梦碎，不过「红魔」今季首要目标，依然係下届欧联入场券，见佢哋对「车仔」正选收起安东尼马迪尔、保罗普巴等主力，睇得出有轻重之分。曼联复赛后气势如虹，近7场联赛5胜2和未输过，5场胜仗均至少赢2粒，弗到漏油。除咗「双核」波基斯费南迪斯伙拍保罗普巴愈嚟愈夹外，前线「三叉戟」格连活特、拉舒福特及安东尼马迪尔脚风奇顺，其中马迪尔今季联赛已入17粒，係继2008-09年度嘅安历卡之后，单季英超入球最多嘅法国球员，特别係「波费」加盟后唔愁冇供应，令佢士哥不断，信心爆棚。

锤仔帮作客脚软

韦斯咸喺主帅莫耶斯带领下，上仗主场以3比1击败屈福特后，已经肯定上岸，「护级专家」绝非浪得虚名。莫耶斯今场虽然倒戈，但韦斯咸众将达成目标后，难免鬆懈，尤其防线甩漏唔少，以其近9场联赛作客7度落败劣绩，实在不宜高估。曼联主帅苏斯克查擅打闪击战，近6场联赛均于上半场取得领先优势，其中5场由头赢到尾，今仗为免夜长梦多，势必尽快入波锁定胜局，半场主胜有计。