执掂防线杀得性起
今晚英超快车恶战连场，阿仙奴喺主场迎战3哥李斯特城。「兵工厂」连盃赛豪取4连胜，有传队长奥巴美扬续约一事有进展，士气大振，加上一向靠主场搵食，酋长球场更专剋「狐狸」，为争下届欧洲赛入场券必搏尽，主胜有计。
李城上仗大胜水晶宫3比0，自复赛后首尝胜果，射手占美华迪更省两粒，令佢喺英超累积101球，跻身英超「100 Club」，终于翻身，不过佢哋直到下半场先打开纪录，而且水晶宫已差唔多上岸，战意麻麻，失波后即告崩溃，加上「狐狸」主力艾约斯佩雷斯、占士麦迪臣都伤埋，唔好睇得佢哋咁高。
反而复赛后即两连败嘅阿仙奴，主帅阿迪达见势色唔对变阵，改踢3后衞阵式图巩固防线，以往喺中路错漏百出嘅梅斯达菲同大衞雷斯，喺加入哥拉辛拿斯帮手后，多个人执漏亦稳阵咗好多，连英足盃在内，近4场赢晒之馀，只係失咗1粒咁大把，包括上仗作客以2比0击败弗爆嘅狼队，令信心回升。
奥巴美扬放风续约振士气
之前唔肯续约嘅队长奥巴美扬，近日开始转口风，暗示续约问题有得倾，仲大讚自阿迪达中途上任后，球队愈踢愈好，睇嚟留队机会唔低，仲可以稳定军心。的确阿迪达接手后，阿仙奴主场演出特别醒神，近6场英超主场取得5胜1和未输过，复赛之后唯一一场主场赛事，就以4比0大炒诺域治，对上4场主场有3场攻入3球或以上，火力唔讲得笑，为争下届欧洲赛席位，主场出击更不容有失。何况阿仙奴主场向来係李斯特城「凶地」，单计酋长球场，「狐狸」近5次联赛造访此地都输波而回，阿仙奴有力乘胜追击，主胜有买趁早。
