降班悬崖自我救赎

英超下游球队为护级豁出去！排联赛尾3嘅阿士东维拉及尾5嘅韦斯咸已经企喺降班边缘，唔想「堕崖」来季跌落英冠，今晚分途出击一定搏命，不过佢哋嘅对手非善男信女，想攞晒救命3分绝对唔易。

维拉输到慌捧红军半场Ｗ

今晚英超强弱悬殊之战，1哥利物浦主场迎战尾3嘅阿士东维拉。虽然红军已提早封王，但上仗有所鬆懈即惨吞曼城4蛋坚肉酸，为保冠军颜面冇得再Hea踢，而且佢哋今季主场联赛赢晒之馀，仲分外抢缰，护级分子维拉随时半场都守唔住，半场主胜咪错过。

利物浦提早7轮夺冠，上仗係佢哋笃定捧盃后首场赛事，即作客畀死敌曼城蹂躏，成班波似乎仍沉醉喺首夺英超嘅欢乐气氛当中，表现走晒样。老实讲辛苦咗成季，终于达标而有所鬆懈亦係人之常情，不过主帅高普出名高要求，突如其来嘅惨败犹如解酒药，畀「红军」尽快清醒，何况佢哋仍想打破曼城100分嘅英超最高积分纪录，需要喺馀下6轮攞多15分，今仗不容再失。

维拉复赛未赢过

维拉虽然要抢分护级，可惜状态坚差，单计复赛后4仗联赛，只得2和2负未赢过，仲要入得两粒咁大把，攻守都咁曳，就算有「维拉柏豪」基亚利殊助阵亦难单天保至尊。值得一提嘅係，利物浦主场威力惊人，今季16次联赛主场赢晒不特止，有13仗喺上半场已取得领先优势，可见佢哋每逢喺晏菲路出击必定先发制人，相反维拉16次作客联赛输咗11场，单计近5次客场联赛就有4次半场落后，见到都唔开胃，造访急于反弹嘅「红军」，半场主胜更值博。

韦斯咸纽卡素大驳火

排16位嘅韦斯咸嘅抢分任务，就係今晚作客圣占士公园球场对战纽卡素。两军周中都製造惊喜，纽卡素作客大炒般尼茅夫，创球队今季联赛最大胜仗；韦斯咸上场伦敦打吡击败车路士，亦打出今季漂亮一仗，两支当弗球队对碰肯定擦出火花，中位数2.5球入球大好路。

双方交锋劲旺入波

未计昨晚赛事，「锤仔帮」韦斯咸经过32战以30分排尾5，同降班区只有3分距离，乌克兰老将耶莫兰高上场入波，带领韦斯咸3比2绝杀车路士，激起全队士气，亦为「锤仔帮」联赛重开经历2连败之后，首度成功抢分，虽然今场作客出击，但为抢分尽快上岸，一定唔会踢得保守。睇番韦斯咸近4次对「喜鹊」往绩，原来各赢2次，彼此争胜决心都强，今晚预期又一次出现驳火场面。

纽卡素自从有沙特财团入股消息传出之后，球员场上表现积极，复赛后联赛3战2胜1和，3场合共轰入8球，呢8个入波分别来自6个球员，摆明个个争取表现博留队，唔会因为成功护级揸流摊，双方近5次联赛碰头4次开总入球3球或以上，今场实同韦斯咸上演入球骚，大盘咪错过。