今晚韩职尾场，仁川联主场迎战浦项制铁。仁川联火力极弱，至今仲係食白果，惟有先做好防守，撞正有3名球员服兵役离队嘅浦项，初段势必又玩拉布，半场和有计。

仁川联係出晒名嘅护级专家，虽然佢哋今季攻力曳爆，至今竟录得0入球嘅劣绩，但你咪理，佢哋头3轮取得2和1负，仅失1粒，仲要係输12码，可见仁川联坚有自知之明，既然前线哑火，一旦先失守就好难翻身，必定防守行先玩拉布，拖得几耐得几耐，其中两仗都拖到个0比0赛果执到2分，而全部3仗半场都开0比0，拖字诀係有效喎。况且澳洲中场马夏斯、波斯尼亚后衞哥顿宾路沙今场可能复出，应该更加守得。

浦项3将服兵役最伤

浦项开季头3轮获1胜1和1负，包括上仗反输畀FC首尔，表现一般，而且有许榕埈、沉相旼及金容奂去咗服兵役，后两者更係正选二闸，预计朴在旭及金相沅会顶上，但佢哋经验较浅，未必能即刻上力，连同另一守将河昌来上阵成疑，4人防线有3个位未定，都咪话唔牙烟，客场出击都唔敢乱攻住。加上双方近6次碰头，亦有4次开半场和，呢场求稳格局，半场和值得追多铺。