火力弱鸡唔敢乱嚟
周六晚德乙中下游对决，纽伦堡主场硬撼波琴。两军都需要抢分护级，为免输波益咗同场劲敌，必定小心谨慎，加上波琴客场出击例必保守，纽伦堡又欠缺赢波本钱，预料今场入波唔会多，中位数2.5球入球细好路。
纽伦堡位处下游，只领先尾3嘅卡尔斯鲁厄2分，喺联赛重开之后，纽伦堡3场联赛只得2和1负，踢3场都仲係开唔到斋，主要係球队入波能力唔高，虽然3场入咗3球，但有2球分别係前仗对手奥厄，以及上仗对手雷根斯堡送嘅乌龙球，真係由纽伦堡自己射入嘅只得1粒。以表现而论，纽伦堡喺多场比赛都取得控球优势，射门亦唔少，组织有板有眼，但就係入唔到波，由攻势转化成入球嘅能力偏弱，就算前锋米高费尔今场刑满复出，恐怕亦未必有好大改善。
玩即场留意两军落后难翻身
对手波琴喺德乙入球数字名列前茅，不过大部分来自主场，单计联赛客场暂时只入12球，係今季德乙作客入球第3少嘅球队，庆幸佢哋作客失波数字亦唔高，只失18球，失球数字係德乙第2少，令球队近5场联赛作客有4场开2球或以下。更加麻烦嘅係，佢哋嘅前锋西蒙祖拿喺上周末作客闷和卡尔斯鲁厄0比0之役伤出，今场上阵成疑，攻力进一步打折扣。既然两军都冇乜本钱强攻，现阶段各得1分相信係双方都乐意见到嘅赛果，2.5球入球细当然要玩，亦可以小注和波博收两瓣。
由于今场有直播，喜爱玩即场嘅球迷可参考一下以下数据，纽伦堡今季6次主场落后0比1，4次输波2次追和，波琴今季6次作客落后0比1则全部落败，可见两军都冇翻身本钱，大家可以特别留意。
