慕逊加柏射手柏利亚
双箭抢缰嗒私房菜
今晚德甲前列大战，「3哥」慕逊加柏主场对第5位嘅利华古逊。慕军法国孖宝马古斯杜林及柏利亚复赛后状态大勇，加上近年碰头食住利华古逊，保「前4」关键战势抢赢波3分，平手盘有买趁早！
上季歇冬后走晒样嘅慕逊加柏，今季同样喺歇冬后跌Watt，从冬季亚军一度跌落第4位，但新冠肺炎疫情爆发令联赛停摆，反而畀到佢哋时间喘息调整。慕军上周联赛重开作客法兰克福，即如狼似虎，凭柏利亚开波35秒闪电入波，加埋马古斯杜林打破自上年12月头以来，连续12场联赛嘅入球荒，轻鬆赢3比1升上「3哥」位，现时落后榜首拜仁6分，仲有机会争标。
利华古逊抢攻易出事
查实利华古逊近况亦唔错，联赛重开首场作客大炒云达不来梅4比1，20岁新星夏维斯更省两粒，呢位德国国脚今年各项赛事，录得9个士哥及7次助攻，协助球队歇冬后联赛豪取7胜1和1负，现时只落后「4哥」RB莱比锡1分，为争下届欧联入场券，今场或会主动出击。不过利华最大问题係攻强守弱，歇冬后9场联赛只得3场冇失波，共失10球，连弱旅不来梅、柏达邦及柏林联都搵到食，加上悍将拿斯宾达续抖，防守不稳难望改善。
慕逊加柏一向靠主场搵食，今季13场联赛主场录9胜2和2负，成绩仅次于多蒙特及拜仁，唔讲得笑。翻查纪录，两军近4次碰头，慕逊取得3胜1负，包括3次联赛赢晒，摆明格食格喇，遇上以攻代守嘅利华，益晒慕逊打最擅长嘅反击，主场仲唔使让波，平手盘必捧慕军。
