上足弹药争踢季后赛

硕果仅存嘅受注赛事澳职今日上演两场好戏码，尾场由珀斯光辉主场斗西部联。两军目前仍要抢分争入季后赛，光辉係今季主场联赛入波最多球队，从未试过交白卷，对住近2场狂轰11球嘅西部联，有望合演入球骚，中位数2.5球大盘值得热捧。

上季常规赛冠军珀斯光辉现以20战得31分排联赛榜第5位，落后榜首FC悉尼17分，衞冕机会名存实亡，佢哋依家比第8位嘅西悉尼流浪者多5分，季后赛资格仲未稳阵，主场出击唔可以放软手脚。光辉今季成绩下滑，主要原因係后防演出跌晒Watt，上季佢哋全季只失23球，今季踢咗20场已失22球，稳健度大不如前，好在佢哋攻力保持水准，今季9场主场联赛场场有入波，而且仲係今季澳职主场入波最多球队，合共轰入22球，有本钱以攻代守。

以攻代守斗全民皆攻

今季首度亮相澳职嘅西部联踏入2020年后表现麻麻，头6场联赛只得1胜1和4负，不过佢哋近2场先后大炒中岸水手6比2及阿德莱德联5比1，重燃争入季后赛希望，如果赢埋今场「6分波」，前途更加一片光明。西部联阵中除有澳职史上入球王贝利沙及前意大利国脚迪亚文迪挂帅，近2场个人入4球嘅中场麦斯贝基斯、上场交出助攻「帽子戏法」嘅右闸祖舒亚列斯顿亦状态托弗，现时全民皆攻，承接对上2场大胜馀威，作客唔怕与光辉对攻，今场大细中位数有2.5球，大盘绝对係不二之选。